LEGAZPI CITY- (Update) Balik na sa normal an operasyon kan Masbate City Port makalihis an nairehistrong pagsabog kan improvised explosive device (IED) harane sa pantalan bandang alas-11:15 kasubanggi.
Sa ekslusibong intrevista kan Bombo Radyo Legazpi ki Engr. Jocelyn Cepres ng Philippine Ports Authority (PPA)-Masbate, dagsa pa man an mga biyahero sa pier mantang dae man guranong nagcausa nin destroso an nangyari sa walang parte kan port.
Napag-araman man ki Cepres na ini an enot na bes na pinasabugan an port mantang nagtutubod na ‘nakikiuso sana’ an nasa likod kan insidente makalihis an nangyaring car bombing sa Lamitan City, Basilan.
Posible man suboot na bako sa mismong gate kan pantalan nag-agi an suspek asin nagamit man kan bangka sa pagsasagibo kan krimen.
Enot naman na napag-araman na naglubog an sarong bangkang pigsasabing pagsadiri ni Pastor Choi Tuson mantang wara naman na iba pang nakulgan sa insidente.
Mientras tanto, inasegurar man kan PPA kaibanan an PNP Maritime Unit asin Philippine Coast Guard an heightened alert status sa pagtataong-seguridad sa lugar.
