LEGAZPI CITY- Nagpapadagos pa an hot pursuit operation kan kapulisan kontra sa Concepcion criminal group makalihis an nangyaring engkwentro sa Libon, Albay kung saen duwa sa miembro kan grupo an naarestar.
Sa ekslusibong intrevista kan Bombo Radyo Legazpi ki PC/Insp. Diome Cardano, hepe kan Libon Municipal Police Station, naka-standby sa barangay Molosbolos kan nasabing banwaan an pulisya kan bigla na sanang paputukan kan grupo.
Nagdurar man nin limang minuto an ribayan nin mga putok kan mga pulis asin gang members hasta sa magdesisyon an mga ini na magdulag na sana.
Maikokonsiderar man giraray na trayumpo kan gobierno an nangyari makalihis na maarestar an duwang miembro na binistong si Arturo Payson kaibanan an saro pang menor de edad.
Sa presente, nasa kustodiya na kan pulisya si Payson mantang itinurn over na man an menor de edad sa pangangataman kan Department of Social Welfare and Development (DSWD).
Kun babalikan, Concepcion group man an ipigtutukdong responsable sa mga insidente nin high profile crimes sa Bicol asin iba pang pagtaraid na lugar.
