LEGAZPI CITY- Nagpagirumdom ngonian an Civil Aviation Authority of the Philippines (CAAP) Legazpi urog na sa mga mahihilig magpalayog nin buradol, hot air balloons asin drones na harane sa airport kan ciudad.
Sa intrevista kan Bombo Radyo Legazpi ki Atty. Neilito Lobango, legal officer asin tagapagtaram kan CAAP Legazpi, piglalaoman na an pagdakol kan mga magsasagibo kan leisure activity mantang nasa summer vacation kaya apela kaini an pagsunod sa eksistidong Provincial asin City Ordinance na nagbabawal digdi.
Pag-eksplikar pa ni Atty. Lobango na ipigpapaotob sana an nasabing pagbabawal para na man sa seguridad kan mga aircrafts asin pasahero.
Napag-araman na posibleng mapatawan nin multang dae malagpas sa P15,000 o pagkakakulong nin dae mababa sa 15 aldaw alagad dae malagpas sa anom na bulan an siisay man na mapoprobaran na mabayolar sa ordinansa.
Mientras tanto, kaibanan sa mga pinadarhan nin surat kan ahensya sa pagsimbag sa pangapodan an mga banwaan kan Camalig, Jovellar, Daraga asin Legazpi City na sakop an 10 mile-radius o 16 kilometres hale sa center kan runway.
