LEGAZPI CITY- Nakumpiskar kan Meat Inspection Team sa ciudad kan Legazpi an kilo-kilong karne na warang magkakanigong dokumento makalihis an isinagibong paglilibot sa sarong mall.
Isinagibo an operasyon sa pangengenotan ninda Dr. Alex Templonuevo, Officer in-Charge kan Regional Technical Operation Center V asin Dr. Emmanuel Estipona, Assistant City Veterinarian.
Nagresulta ini sa pagkakarekober kan 64.77 kilo na hita kan manok hale sa LCC Supermarket kan Ayala Malls sa ciudad.
Susog sa inisyal na imbestigasyon, inangkat pa sa Estados Unidods an ipigpapabakal na karne alagad wara man na naipresentar na certificate of meat inspection an mga personahes sa nasabing supermarket na rason tangarig na kumpiskaron an mga ini.
Katakod kaini, pighahanda na kan team an posibleng paninimbagan kan manehamiento kan nasabing supermarket sa nakomiter na pagbayolar sa Acta Republika Numerado 10536 o an inamyendaran na Meat Inspection Code of the Philippines.
