LEGAZPI CITY- Nagmumundo ngonian an bilog na kapadian sa provincia kan Albay makalihis an kinaimbweltuhang aksidente kan sarong padi na nagresulta man sa pagkagadan kaini.
Sa nagunong impormasyon kan Bombo Radyo Legazpi, napag-araman na pigbabaybay kan motorsiklong pagsadiri ni Father Gerardo Joselino Santillan, 64-anyos asin nagtitindog na Asst. Parish Priest kan St. Peter Paul Parish sa banwaan kan Polangui an Maharlika Highway sa Brgy. Banao, banwaan kan Guinobatan kan mabangga sa sarong nakaparadang behikulo.
Padagos pa man na pig-aaram kan mga otoridad kun mechanical o human error an nangyari.
Mientras tanto sa suway na intrevista ki Fr. Frederick Naga, incoming Asst. Parish Priest sa banwaan kan Oas, hagad kaini an pamibi para sa kalag kan padi urog na sa biglaan na pagkawara siring man sa nawalat na pamilya para sa kusog.
Binalikan pa ni Fr. Naga an dakol na naginibo kan ipigsaladawan na maboot na tawo kaya namomotan man kan kasaraditan.
Napag-araman man ki Fr. Naga na labi na sa 25 taon sa pagpadi si Fr. Gerry asin nagin estudyante pa sa seminaryo an mga notableng tawo siring ninda Albay Cong. Joey Salceda asin dating Vice Governor James Calisin.
Nakatalaan pa kuta si Fr. Gerry na magsirbe bilang assistant parish priest kan St. Gregory the Great Cathedral sa Albay na ma-asumer sa maabot na Hulyo 1.
