LEGAZPI CITY- Pig-iimbestigaran na kan mga otoridad an pigtutubudang paghuhugot kan sarong lalaki sa Brgy. Abas, banwaan kan Pilar, Sorsogon.
Binisto an nasabing persona na si Charles Manuel, 47-anyos na residente kan nasabing barangay.
Susog sa inisyal na imbestigasyon kan Pilar Municipal Police, nahiling kan mismong esposa kaini na nabistong si Vilma si Charles na nakabigti sa harong.
Tulos man ining nag-apod nin tabang sa bayaw tangarig na madara pa an agom sa ospital alagad dae naman nagibo pang maisalbar sa kagadanan an lalaki.
Nagluluwas man na nagkaigwa nin dae pagkakasinabutan an duwa huli sa problemang pinansyal antes na mangyari an insidente kun saen nauli pa sa ribayan kan malalaen na tataramon.
Dae man nagibong magka-inulian kan duwa hasta sa mahiling na sana an nasabing lalaki sa siring na sitwasyon.
Wara man nahiling na pwersahang paglaog sa nasabing residencia durante kan ocular inspection kun kaya nagtutubod an pamilya na wara man na foul play na nangyari.
Sa presente, isinairarom na man an bangkay sa autopsy examination.
