LEGAZPI CITY- Arestado an sarong drug pusher na nagagamit nin mga jovenes sa pagdeliver nin mga droga sa isinagibong buy bust operation kan otoridad sa ciudad kan Ligao.
Nabisto an naarestar na suspek na si Emna Hanohan 45 anyos, residente kan Barangay Tinago sa nasabing lugar.
Sa intrevista kan Bombo Radyo Legazpi ki P/Supt. Lorenzo Bacia, hepe kan Ligao PNP, modus operandi kan suspek na magpadeliver kan ipigpapabakal na iligal na droga sa mga parokyano sa mga jovenes na edad 6 hasta 7-anyos karibay an P20.00.
Segun kiBacia, saro sa mga operatiba an nagpabisto bilang poseur buyer na nakipagtransaksyon sa suspek.
Kan itao na kan target an droga asin akoon an buy bust money, tulos na ining pinusasan asin inarestar.
Nakua pa sa supek an limang sachet kan pigtutubudang shabu mantang napag-araman na dati na ining naisyuhan nin arrest warrant asin kaibanan sa drugs watch list kan nasabing lugar.
Sa ngonian, nasa kustodiya na kan pulis an suspek na nahahampang sa kasong pagbayolar sa Acta Republika Numerado 9165 o Comprehensive Dangerous Drugs Act of 2002.
