LEGAZPI CITY — Dagos man liwat an taunang Penitencia sa Mayon 2018 alagad mas hihigutan ngonian an seguridad sa tahaw kan kalamidad na Alert Level 3 kan bulkang Mayon.
Segun ki Gel Molato Jr., Tabaco City Disaster Risk Reduction and Management Office chief, napagkauruyunan sa nagkapirang miting kan mga nanunungdan na gigibuhon an Alay-Lakad poon sa Crossing Paraputo, Estancia, Malinao pasiring sa Nazareth Complex, Brothers of Charity, Tabiguian, Tabaco City na may distansyang 5.6 kilometer.
An nasabing ruta an nakapalaog sa Plan B kan opisina makalihis na dae na tugutan pa an pagsakat mismo sa may Mayon Planetarium huli sa sakop ini kan danger zone.
Nakipag-koordinar naman an CDRRMO sa Philippine National Police na i-block an tinampo pasakat sa Mayon ngani na dae makalaog an mga mairiba sa prusisyon.
Pupunan an paglakaw para sa Via Crucis atyan na alas 6 nin banggi pasiring sa Nazareth Complex, Tabiguian, Tabaco City na susundan nin misa.
Nagpagirumdom man si Molato sa mga masabay sa pilgrimage na sa walang gilid kan tinampo sana mapundo an pag-istasyon ngani na dae makaulang sa trapiko.
Pangengenotan ni Most Rev. Joel Baylon an banal na misa atyan na alas 10 nin banggi na susundan nin pag-prusisyon kan Blessed Sacrament pasiring sa San Lorenzo Shrine Chapel, Nazareth Complex, Tabiguian.
