LEGAZPI CITY — Masairarom sa retraining asin mahahampang sa administrative penalties an limang kan pulisya sa Bicol makalihis na ma-relieve sa saindang mga posisyon huli sa pagpalyar na mapuho an illegal gambling operations sa nasasakupang lugar.
Segun ki Po. S/Insp. Malu Calubaquib, tagapagtaram kan Philippine National Police (PNP) Regional Office 5, kasabay sa mga na-relieve an hepe kan Donsol Municipal Police Station sa Sorsogon; Daet Municipal Police Station asin Mercedez Municipal Police Station sa Camarines Norte; asin Lagonoy Municipal Police Station asin Pasacao Municipal Police Station sa Camarines Sur.
Dugang ni Calubaquib, saro sa mga ini an superintendent asin apat na chief inspector.
Parte suboot an lakdang kan ipigpapautob na one strike policy sa irarom kan kasuguan ni PNP chief Director General Ronald Dela Rosa.
Base sa data kan PRO5 poon Pebrero 3, 2017 hasta Marso 18, 2018, naikondusir sa bilog na rehiyon an 1,226 police operations asin kabilugang 2,912 suspected illegal gamblers, kasabay an limang elected officials an nadakop.
Sa Albay, kasabay sa naarestar an sarong bise alkalde asin barangay officials asin saro pang government official sa Sorsogon.
Imbwelto an mga nadakop na suspek sa sabong, jueteng, fruit game, drop ball, mahjong, color game, sakla, cara y cruz, STL bookies asin iba pang klase nin illegal gambling. Nakapagkumpiska man nin kabilugang bet money na nagkakantidad nin P666,000 (P666,060.30).
Dugang pa kan opisyal, posibleng madugangan pa an mga mare-relieve sa pwesto huli sa nasa proseso pa an high-ranking officers sa Camp Gen. Simeon Ola asin an reviewing panel sa pagrepaso kan overall performances kan gabos na COP asin provincial directors.
