LEGAZPI CITY — Mismong an suspek sa pananaksak an nag-report sa pulisya dapit sa ginibong krimen kun sain nagadan an biktima na kapwsa paraoma sa Barangay Malabog, Daraga, Albay.
Binisto an biktima na si Noel Antones kan Purok 8, Sitio Malada mantang nabisto an mga suspek na sinda Jose Pangilinan, 56-anyos asin aki kaini na si Eric Pangilinan, 23-anyos.
Napag-araman na mismong si Jose an nagpasiring sa hepatura kan Daraga PNP asin nagtuga na imbwelto sa pananaksak kun sain itinurn over man kaini an tabak na may sukol na poco mas o menos 57 pulgada na suboot ginamit sa krimen.
Base man sa imbestigasyon kan pulisya, nahiling kan mga witness na naghihingalo an biktima kaya tulos na tinabangan asin dinara sa ospital. Alagad pag-abot digdi, idineklarar na gadan kan doktor.
Tulos man na dinakop an mag-ama kun sain nagtetenir sa istasyon kan pulisya si Eric mantang under arrest si Jose mantang nagpapabulong kan sinapar na injury. Nagkaigwa kaya suboot nin agawan kan tabak si Jose asin an biktima kun kaya nagsapar man nin lugad an suspek.
Sa ngonian, ipighahanda na an kasong homicide na isasangat kontra sa mag-ama sa paagi kan inquest proceeding sa opisina kan Provincial Prosecutor kan Albay.
