LEGAZPI CITY — (Update) Problema sa pamilya an pighihiling na rason kan paghuhugot kan 18-anyos na daraga sa Barangay Tuburan, Ligao City kan nakalihis na aldaw.
Segun ki Pol. Supt. Lorenzo Bacia, hepe kan Ligao City Police Office, banggi kan Marso 10 o sarong aldaw antes mangyari an insidente, nagkaolay suboot ini kan ama kun saen napag-araman na nagpahayag an aki na mas maray na mawara sa kinaban huli ta bako suboot padaba kan pamilya.
Mahigot man na kinontra kan ama an naunambitang plano kan aki.
Alagad kinaagahan, nakigkig na sana ini kan mahiling an daraga sa second floor kan harong na nakabigti na gamit an plastic straw asin wara nang buhay.
Binalo pa kutang i-revive an babaye alagad dae na naagapan pa.
Mientras tanto, segun ki Bacia makamurumundo na paghuhugot an nasa isip ngonian kan nagkapirang jovenes na garing dae na pigtatawanan nin importansya an buhay.
Abiso kaini na magserbing adal sa mga jovenes an nangyari mantang tangarig na mapreventaran an pangyayari, kaipuhan an giya kan mga magurang.
