LEGAZPI CITY — Liwat na isasairarom sa duwang semanang pagsusuri asin closed monitoring an bulkang Mayon makalihis ining ibaba sa Alert Level 3 status.
Sa intrevista kan Bombo Radyo Legazpi ki Philippine Institute of Volcanology and Seismology (PHIVOLCS) Dir. Renato Solidum, hihilingon sa itinagamang panahon kun mapadagos an suboot ‘downward trend’ kan mga parametong pigbabantayan.
Dugang na eksplikasyon ni Solidum na hasta nagluluwas an lava sa ngimot kan bulkan, boot sabihon kaini na padagos na magmatic activity alagad nasa itaas na parte sana suboot ini sa presente.
Mientras tanto, dae man pighahali kan ahensya an posibilidad na ibalik an Alert Level 4 en kasong magkaigwa nin ‘resurgence’ o liwat na pagtaas kan aktibidad kan bulkan na harayo pa suboot mangyari sa presente.
Marurumdumang kasuodma nin aga kan inanunsyar kan PHIVOLCS an pagbaba sa Alert Level 3 huli sa naobserbahang kabilugang pagbaba kan unrest sa bulkan partikular na sa katamtamang seismic activity asin pagsangaw kan gas, pag-impis sa hawak kan bulkan asin pagbaba kan eruptive activity kaini.
