LEGAZPI CITY — Kinasuhan kan Department of Trade and Industry (DTI) provincial office sa Albay an pitong nagbalgar sa ley na tindahan sa provincia.
Segun ki DTI-Bicol Director Jocelyn Blanco, kinasuhan an mga tindahan makalihis madakop na nagpapabakal nin produkto na warang price tag, na pagbalgar sa Article 81 o “Price Tag Requirement” kan Republic Act (RA) 7394, o an Consumer Act of Philippines.
Segun ki Blanco, isasairarom an mga store owners sa pre-determination conference asin an sisay mang mag-ako kan bayolasyon an kaipuhang magbayad nin administrative fine na nagkakantidad nin P500 hasta P150,000.
Nag-apela man an direcotr sa store owners na magsunod sa requirements kan price tag law urog na nasa irarom kan state of calamity an Albay.
Dae naman suboot maisyu an departamento nin warning oras na madakop na nagbabalgar an tindahan sa anumang probisyon kan Consumer Act.
Inengganyar man ni Blanco an publiko na i-report sa DTI an anumang iregularidad partikular na an price tag requirement.
