LEGAZPI CITY- Ipinaaram kan mga otoridad kan Pilipinas sa Florida na warang nairehistrong Pilipino na nadamay o nakulugan sa nangyaring shooting incident sa laog kan sarong highschool sa Parkland, Florida.
Magigirumdumang nagpaputok nin badil an 19-anyos na suspek na binistong si Nikolas Cruz mantang nagruruluwasan an mga estudyante asin paratukdo kan Stoneman Douglas High School na nagresulta sa pagkagadan kan 17 katawo asin labi sa sampulong nairido.
Sa pahayag na ipinaabot ni Philippine Honorary Consul for Florida Henry Howard sa Bombo Radyo Legazpi, nakipagkoordinar na suboot ini sa Philippine community sa Broward County kan south Florida kun saen napag-araman na wara pa man na known casualties na Philippine citizens o indibidwal na hale sa Pilipinas.
Kinondenar man kaini an latest school shooting sa halawig na suboot na school shooting incidents sa Estados Unidos kasabay kan pag-asegurar sa mga bisita asin immigrants hale sa Pilipinas na salbado man giraray an pagtenir sa United States alagad nag-abisong magin maigmat sa mga nangyayari sa kapalibutan urog na sa public places.
Mientras tanto, kapot na man kan mga otoridad an suspek na napag-araman na enot nang na-expel sa nasabing eskwelahan huli sa ipinataw na disciplinary action mantang nakua man digdi an AR-15 rifle asin mga magazine nin mga bala.
Ipigkokonsiderar an insidente na ikawalo sa deadliest mass shooting sa modern US history kun saen nangengengenot digdi an Las Vegas shooting incident na nagadan nin 58 buhay.
