LEGAZPI CITY – Dakula an pasasalamat kan mga evacuees sa Albay sa pagbisita sa probinsya kan nagkapirang mga celebrities puon kan mag-alburuto an bulkang Mayon.
Marurumduman na nagkapiwang mga local celebrities na an naghatod nin kaugmahan sa mga evacuation centers siring kan komedyanteng sinda Epi Quizon, Bayani Ag Bayani, Long Mejia, aktres na si Katya Santos, asin si Tourism Promotions Board Cesar Montano.
Sa intrevista kan Bombo Radyo Legazpi kay Office of Civil Defense (OCD) Bicol Dir. Claudio Yucot, malalaoman kan mga evacuees na dakol pa an mabisita sa probinsya sa mga masunod na aldaw hasta sa dae nagbabalik sa normal an sitwasyon kan bulkan.
Pag-eksplikar kan opisyal, obheto kaini na mabawasan maski papano an kamunduan na namamatean kan rinibong mga evacuees na aabuton na sa sarong bulan an pagtetenir sa evacuation centers.
Segun pa ki Yucot, sa nagin pagbisita ni Montano, nagpaabot ini nin 10,000 pidaso nin manok asin 10,000 na bunay.
Dae man pinalampas kan aktor an pagkikipagkantahan sa mga evacuees partikular na an mga residente kan Barangay Sua sa banwaan kan Camalig na paramientras na nagtetenir ngunyan sa Barangay Comun.
