‘120K foodpacks para sa Pebrero, preparado na para sa Mayon evacuees; USAID, mapadara nin mga delivery trucks’

LEGAZPI CITY- Pighihiling na aabuton nin 120, 000 foodpacks an kinakaipuhan na ibariwas kan Department of Social Welfare and Development (DSWD) Regional Office 5 para sa bulan kan Pebrero.

Sa intrevista kan Bombo Radyo Legazpi ki DSWD Bicol Dir. Arnel Garcia, preparado man suboot an ahensya na magpakaon kan labi sa 70,000 na evacuees susog sa datos kan Albay Public Safety and Emergency Management Office (APSEMO).

Nakaangkla man suboot ini sa projection kan Philippine Institute of Volcanology and Seismology (Phivolcs) na posibleng magdurar nin hasta tolong bulan an pag-aalburuto kan bulkang Mayon.

Mientras tanto, nakipag-meeting man si Garcia sa United States Agency for International Development (USAID) kaibanan si Albay Governor Al Francis Bichara na parte kan World Food Program asin logistic support.

Hinagad kan ahensya an augmented support sa ten-wheeler trucks na madeliver kan mga foodpacks na hale pa sa warehouse kan DSWD central office sa Manila mantang target man an direct delivery sa mga apektadong local government units.

Piglalaoman na maabot na an mga nasabing behikulo sa malaog na semana.