LEGAZPI CITY- (Update) Pig-iimbestigaran na ngunyan kan mga otoridad an posibleng koneksyon kan narekober na 25 pakete nin cocaine sa Juag Lagoon sa Brgy. Calintaan sa banwaan kan Matnog, Sorsogon sa luminubog na Taiwanese vessel sa Northern Samar na harani man sa nasambitan na lugar sa kasagsagan kan panrarapado kan bagyong Agaton.
Sa ipigsagibong press briefing, pigbuyagyag ni PNP Bicol Director PC/Supt. Antonio Gardiola na dae ninda pighahali an posibilidad na konektado ini sa paglubog kan M/V Jin-Ming Nr. 16 kan Martes na hapon.
Lunad kaini an anom na crewmembers na residente kan China, Hong Kong asin Taiwan na nasa pangangataman ngunyan kan law enforcement unit sa nasambitan na lugar.
Katakod kaini, nakatalaan na magsagibo nin search sa nasambitan na barko kan pulisya Philippine Drug Enforcement Agency sa pakikipagkoordinar sa Naval Forces for Southern Luzon mantang pig-iimbestigaran na man an iba pang barkong nag-aagi sa Pacific Ocean.
Enot nang napag-araman na nagkakantidad nin P5 milyon an kada pakete kan cocaine na nasa poco mas o menos sarong kilo na may kabilugan na P125 million sa 25 pakete.
Mientrastanto, sa suway na intrevista ki PNP Bicol spokesperson PS/Insp. Malu Calubaquib, posible pa suboot na mas mahal pa an barakalan kaini urog pang mayayaman sana an kayang magbakal kan nasambitan na droga mientras na an shabu an patok sa Pilipinas na pig-aapod man na ‘poor man’s cocaine.’
Marurumduman na Disyembre 2016 kan makarekober man nin 18 bricks nin cocaine sa kadagatang sakop kan Brgy. Sogod, Tiwi, Albay na nagkakantidad nin P90 million.