LEGAZPI CITY- Nag-ibakwar an nasa 594 na persona o 122 pamnilya sa Sorsogon huli sa pagbaha asin landslide na dara kan duro-deretsyong matinding pag-uran.
Sa intrevista kan Bombo Radyo Legazpi kay Ariel Doctama kan Provincial Disaster Risk Reduction Management Council (PDRRMC) Sorsogon, ipighayag na kinaipohang ilipat nin lugar an mga residente huli sa huma kan nasabing mga kalamidad.
Segun kay Doctama, hali sa mga munisipyo kan Gubat, Casiguran asin Juban an mga evacuees asin igwa man sa Sorsogon city.
Ipighayag kan opisyal na nagkaigwa nin pag-apaw nin spillway sa Casiguran dara kan kadakol na nagbubulos na tubig, kung kaya paramientras na dae naagihan kan saraday na mga behikulo an lugar.
Dugang pa ni Doctama na may mga nangyaring pagrasay man nin daga sa mabulod na parte ka mga nasabing lugar.
Mientras tanto, tinawang kan opisyal na nakabantay man an saindang hepatura nganing magtao nin asistensya asin tabang sa mga nagtitinir sa mga evacuation centers kan probinsya.
Pinaglalaoman man ni Doctama na dae naman madudugangan pa an numero kan evacuees makalihis na halion na kan Philippine Atmospheric, Geophysical and Astronomical Services Administration (PAGASA) an yellow rainfall warning sa Sorsogon.