LEGAZPI CITY- Kinanselar na an gabos na klase sa bilog na probinsya kan Albay magpoon ngunyang aldaw huli sa raot kan panahon.
Segun sa ipinaluwas na Provincial Disaster Risk Reduction and Management Council (PDRRMC) Advisory 2 na pirmado ni Albay Governor Al Francis Bichara, gabos na lebel kan klase mapa-ppribado man o pampubliko an suspendido.
Paramientras man na wara nin laog an mga teaching asin non-teaching staff kan mga nasabing eskwelahan.
Katakod iyan kan ipinaluwas na yellow rainfall warning kung sain pinaglalaoman an matitinding bulos nin uran.
Pig-aabisohan man an publiko para sa posibleng pagbaha asin pagrasay nin daga.
Mientras tanto, pig-abisohan man an gabos na miyembro kan Local Disaster Risk Reduction and Management Council (LDRRMC) asin mga opisyal kan barangay na padagos na maging alerto para sa pagtataong ayuda sa saindang mga nasasakopan.
