LEGAZPI CITY – Nakatalaan na mag-opresir nin libreng sakay an Police Regional Office 5 sa Disyembre 4 hasta sa 5 katakod kan ikokundusir na duwang aldaw na tigil-pasada.
Segun ki Police Senior Inspector Malu Calubaquib, komon na limang truck an saindang pigpapaluwas kun sain may mga karatula ining ‘libreng sakay’.
Pag-eksplikar kan opisyal, ini na man an saindang itataong ayuda sa mga commuters na maaapektaran kan transport strike asin malibot suboot ini sa probinsya kan Albay.
Katakod kaini, an kada munisipyo man an magamit kan saindang sadiring mobile para sa mga commuters.
Segun sa opisyal, posible pang umabot haling Legazpi pasiring sa nabwaan kan Camalig an saindang mga truck depende sa pasahero.
Mientrastanto, magkakaigwa man nin aktibidad an PRO5 sa maabot na Disyembre 9 asin 10 para sa pag-secure kan mga gun holders.
Inimbitran kan opisyal an gabos na gun enthuciast na magpasiring sa Camp General Simion Ola ngai na magpartisipar sa aktibidad.
An mga civilian shooters suboot an naka-schedule sa Disyembre 10 kun sain pinaka obheto kan caravan an makapag-posses nin firearms.
Dugang pa ni Calubaquib na imbitado man an mga gun store owner na magdisplay kan saindang mga kagamitan ngani na makakua nin mga pangangaipo sa saindang mga badil an mga gun owners.
