LEGAZPI CITY — Ikinondusir kan Department of Health (DOH) Bicol an Volleyball for Health program na mayor na obheto an pagbabawas nin timbang ngani na makalikay sa mga lifestyle diseases.
Sa intrevista kan Bombo Radyo Legazpi ki DOH-Bicol Nurse 5 Windalyn Baluis, kadakol an nagpartisipar sa programa kun sain walong challengers an representante kan 20 manlaen-laen na ahensya de gobierno.
Puon kan Marso 14 hasta ngonian na bulan kan Oktubre, aro-aldaw an pag-engganyar sa mga ini na mag-ehersisyo sa paagi kan pagkawat kan voleyball na dakula an maitatabang sa pagbawas kan timbang.
Antes na magpuon an programa, kinua na an timbang kan mga partisipante ngani na mahiling an resulta o kun pira an nabawas sa pagtatapos kan programa.
Naglalaom an ahensya na dae sana maniwang an mga nagpartisipar kundi magkakaigwa man nin makusog na hawak asin harayo sa mga helang.
Nagpatanid man si Baluis sa publiko na ibitaran an mga bisyo siring kan pag-inom, paninigarilyo, sobrang pagkakan asin kawaran nin ehersisyo na nagreresulta sa pagkakaigwa nin malalang helang.
