LEGAZPI CITY — Paramientras na sinuspinde an mainit na isyu sa proyektong road network sa pamitisan kan Bulkang Mayon na pinangengenotan kan first district engineering office kan Department of Public Works and Highways (DPWH).
Ini an nagin desisyon makalihis an ipinagkondusir na techical conference kan ahensya ngani na matawan nin kasimbagan an nagkapirang isyu na kaatakod kan nasambitan na proyekto.
Sa intrevista kan Bombo Radyo Legazpi ki Henry Lopez, chief clearance and permitting division kan EMB Bicol, nadiskubre na warang ECC an infrastructure project kaya ipinasuspendi an proyekto asin liwat na ibabalik enkaso na ma-clear na an gabos na kahaputan kan nagkapirang grupo.
Pighayag man kan opisyal na dae man nakalaog an road network sa protective area alagad laog ini sa 6 km permanent danger zone kan Bulkang Mayon.
Huli digdi, pigsugo an ahensya na magkua nin certification sa Philippine Institute of Volcanology and Seismology (Phivolcs) huli ta iyo an nakakasakop sa bulkan.
Mientrastanto, segun ki Lopez, may mga itatao sindang penalidad sa ahensya huli sa konstruksyon kan nasambitan na proyekto.
Klinaro man kan opisyal na pig-rehabilitate man sana an dati nang eksistidong tinampo sa may pamitisan kan Mt. Mayon asin padagos pa ining pag-aadalan.
