LEGAZPI CITY- Pinaghahanap pa sa ngonian kan mga otoridad an duwang suspetsado sa nangyaring pambabadil sa Brgy. Kinamaligan, ciudad kan Masbate.
Alas-cuatro kasuodma kan pagbabadilon kan mga dae pa nabibistong kalalakihan si Masbate 2nd District Board Member Dionne “Jojo” Lopez.
Sa ekslusibong intrevista kan Bombo Radyo Legazpi sa hepe kan Masbate City Police C/Insp. Gerardo Balatucan, napag-araman na nasa sarong kaunan si Board Member Lopez kaibanan an nagkapirang personahes asin nasa tahaw kan meeting kan biglang maglaog an duwang lalaki.
Nagluwas an saro sa mga ini nin badil asin warang habas na pinaputukan an biktima mantang marikas man na nagdulag lunad kan sarong motorsiklo makalihis na isagibo an krimen.
Dugang pa kan opisyal na nahiling man kan duwang eye witness na nakasulot an mga ini mga kan ordinaryong mga bado.
Nagibo pang idalagan sa ospital an biktima alagad ipigdeklarar na dead on arrival kan doktor.
Segun man ki Dr. Jerry Huyo-a kan Masbate Doctor’s Hospital, nasa 18 lugad an sinapar ni Lopez sa manlaen-laen na parte kan lawas siring kan likod, balakang, tulak asin daghan.
Sa presente, nagpapadagos pa an imbestigasyon kan mga otoridad sa nasabing insidente siring man sa pag-aram sa motibo kan pambabadil.
