LEGAZPI CITY — (Update) Pighahalat na sana ngonian kan mga otoridad an resulta kan isinagibong medical examination sa American national na si William Christopher Cooper, 26-anyos na tubong Philadelphia, Pennsylvania makalihis ining magkrear nin iskandalo sa kahalabaan kan Rizal St., sa banwaan kan Daraga, Albay.
Sa intrevista kan Bombo Radyo Legazpi ki Daraga MPS Chief of Police P/Supt. El Cid Roldan, napag-araman sa girlfriend kaining si Janice Gailan, 30-anyos na igwang mental disorder an tolong bulan karelasyon kun kaya igwa ining pigtotomar na bulong.
Dugang pa kan nasabing nobya na mantang nasa biyahe, ininom suboot kaini an 100 na tabletas kan Clonazepam na bistong anti-epileptic drug mientras na igwa pang darang Quetiapine na bulong man sa bipolar problems kaini.
Sa paghahapot kan hepe sa doktor, napag-araman na tolong tabletas kan Clonazepam sana an inumon kan sarong tawo, pwedesir na suboot ining ikagadan kaya padagos pang pig-iimbestigaran kun ano talaga ang tinomar ni Cooper.
Mientras tanto, nakikipagkoordinar naman ini an hepe sa pulisya sa Samar makalihis na maaraman ki Gailan na ni-raid an harong kan mga ini sa Catarman mantang nag-apod naman sa embahada kan US para sa magkakanigong lakdang sa nasabing foreign national.