LEGAZPI CITY- Kinanselar na kan Association of Southeast Asian Nations (ASEAN) an duwa kutang events kakini sa provincia kan Albay huli sa orolay na panseguridad.
Nakakaag sa surat na ipinadara kan Office of the Director General for Operations an bareta sa dae na paglalawos kan ATRC-Telsom meeting sa provincia na nakatalaan kutang gibuhon sa Misibis Bay Resort puon Agosto 21-25 na katakod naman kan rekomendasyon kan ASEAN Committee on Security.
Sa pag-eksplikar ni Amb. Marciano Paynor Jr. an ‘increased violent activities’ kan extremist groups partikular na an CPP-NPA-NDF na pigtutubudang retaliatory action sa lado kan mga militar an ikinakahandal kan komitiba.
Ipinaabot man suboot kan Information Fusion Center an intelligence report na igwang 800 improvised explosive device na ibinariwas sa mga elemento kan rebeldeng grupo sa Camarines Sur. En kasong sa dagat man ibibiyahe an mga delegado, dae suboot ini magiging feasible urog na sa paiba-ibang kamugtakan kan panahon.
Siring man, ipigkokonsiderar na ‘high-risk’ asin ‘unsafe’ kun idadagos pa an event sa banwaan kan Cagraray, Albay kun kaya napagdesisyunan na sa Metro Manila na sana ipadagos an event.
Mientras tanto, ikinamundo man ni 2nd District of Albay Representative Joey Salceda an bareta urog na kan sarong taon pa suboot nag-commit an Department of Foreign Affairs, Department of Information and Communications Technology (DICT) kaibanan an ASEAN NOC.
