LEGAZPI CITY — Pinatotoohan kan totally blind na kambal na kaya nindang makipagsabayan sa ibang triathletes sa isinagibong 2017 Mt Mayon ASTC Triathlon Asian Cup sa Legazpi City, Albay.
Ipinangaki na warang cornea an 17-anyos na kambal na sinda Jerome asin Joshua Nelmida na tubong Alabang, Muntinlupa.
Segun sa ina kan mga ini na si Annette Nelmida, tulong taon ng nagbabali an kambal sa triathlon kun sain nakapaat na ini asin pangaduwa ngonian na taon.
Istorya kan ina, an mga pagtuyaw kan ibang tao an nagserbing agyat saiya ngane na dae na masabing kaherak an saiyang mga aki.
Puon kaini, nagpuon namang mag-adal an duwa nin piano asin kalauna’y nagsabak sa training bilang athlete sa tabang naman ni Coach Anthony Lozada.
Bilog na taon suboot sindang nagti-train alagad nalilimitahan sana sa duwa hasta tulong aldaw kada semana huli sa medyo makantidad an training.
Mientras tanto, dakulang pasasalamat kan mga magurang kan kambal huli sa mga nagtabang asin nagsuporta sa mga ini ngane na maipagpadagos an nahiligang sports.
Inabisuhan man ni Annette an mga magurang na may aking may impairment na suportaran an mga ini huli sa solamenteng an mga magurang sana suboot an makakatabang sainda asin makakapagpaluwas kan ipigtatagong talento kan mga ini.
Dae sana suboot makakapagtao ini nin inspirasyon kundi makakapagpakusog kan buot kan mga aki asin maiibitaran an anumang negatibong pagtuyaw hale sa ibang tawo.
