LEGAZPI CITY- Nagpagirumdom an sarong police official sa magigin resulta kun magpapadagos man giraray an mga namamanwa sa pag-imbwelto sa illegal gambling activities.
Segun ki P/Supt. El Cid Roldan, hepe kan Daraga Municipal Police, dakulang kasayangan sana suboot sa kwarta an pagsusugal urog na ngonian na intensibo an kampanya kan Philippine National Police sa lindong kan liderato ni Presidente Rodrigo Duterte laban digdi.
Pagbuyagyag ni Roldan, mas mapapagastos sana an mga sugalero sa pampiyansa sa sadiri en kaso madakop sa mga ipigkokondusir na anti-gambling operations kun saen napag-araman na igwa pang kaso na uminabot sa P100, 000 na bail bond na ipigrekomenda para sana sa temporalmenteng libertad.
Nanindogan pa an hepe na gabos na klase nin illegal gambling an dapat na mapapundo mientras na en kaso magbalik man giraray sa gawi, dae maduwa-duwa an mga operatiba na magsagibo giraray nin pagdakop urog na nagpababa si PNP Chief Dir/Gen. Ronald Dela Rosa nin 15-day ultimatum. Nakasasalalay man suboot an trayumpo kan kampanya sa pagdesider kan mga pulis.
