LEGAZPI CITY- Ipigdesignar na bilang bagong Provincial Director kan Sorsogon Police Provincial Office si S/Supt. Marlon Tejada sa paagi ni Police Regional Office 5 Regional Director C/Supt. Antonio Gardiola Jr. sa nangyaring turn over ceremony sa Parade Ground kan Camp Salvador C Escudero Sr., ciudad kan Sorsogon.
Rinibayan kaini si outgoing S/Supt. Ronaldo Cabral na ipigsaladawan ni Deputy Provincial Director for Administration bilang ‘good leader that everyone desires’ asin nag-aaspirar sa karahayan kan kagabsan.
Nagtao man si Cabral nin sarong tula na igwang titulong “Thank you Sorsogon” kun saen nakapalaman an pasasalamat kaini sa gabos na indibidwal asin organisasyon na nagsuporta sa peryodo kan pagsisirbe sa nasabing provincia.
Sa ibong na lado, pano nin agyat man na inako ni Tejada an nakaatang na responsibilidad kasabay kan promesa na gigibuhon an makakaya sa bagong pag-otob kan mga obligasyon.
Bilang pamayo kan Bicol PNP, inagyat man ni Gardiola si Tejada sa mga bagong maabot kan pagsisirbehang lugar urog na dakol an ipigwalat na akomplisyemento ni Cabral mientras na na inengganyar an gabos na pulis na mas magin credible, loyal asin eoektibo sa pagbabariwas kan servicio.
Nakisumaro man sa nasabing okasyon sinda Governor Robert Lee Rodrigueza, mga hepe kan pulisya sa Sorsogon, pamayo kan manlaen-laen na opisina asin dakol na iba pa.
