LEGAZPI CITY — Bistado na kan mga otoridad an panibagong modus ngonian kan mga parahabon nin motorsiklo sa provincia kan Albay.
Ini makalihis na madakop an dae pa nabibistong suspek na suboot na responsable sa panhahabon nin motor sa ciudad kan Ligao.
Segun ki Bicol Communicators Environmental Rescue Group (BCERG) chief Bong Samar, nakaresibe sinda nin impormasyon na igwang sarong kaduda-dudang persona na nahiling saprovincia na pigbubusol an sarong motorsiklo.
Napag-araman na sarong tanod an nakahiling sa suspek kun kaya rinanihan ini asin nagrason pa suboot an suspek na naubusan sana nin gasolina alagad dae suboot nahali an pagdududa kan tanod kaya hinanapan ini nin dokumento o lisensya alagad warang maipahiling an lalaki.
Digdi na nagdesisyon an tanod na imbitaran ini sa hepatura kan pulisya alagad nagsagin sagin na suboot na may problema sa pag-iisip an suspek asin ipigpipirit na lisensya niya an diyaryo na kapot.
Alagad kan madara ini sa pulisya, digdi na nadiskubre na duwang aldaw nang pighahanap kan kapulisan an dara kaining behikulo makalihis na ireport kan sarong Jonathan Dela Torre na nawawara makalihis na habunon sa ciudad kan Ligao.
Sa ngonian, nai-turnover na sa PNP an nasambitan na motorsiklo asin padagos na pig-iimbestigaran an suspek na nagsagin sagin pang bua hasta sa ngonian.
