LEGAZPI CITY — Nakapagkondusir na nin nasa 126 na meeting an mga kapulisan antes na mangyari an ASEAN meeting sa syudad kan Legazpi sa Agosto 21 sundo 25.
Segun sa tagapagtaram kan Albay Police Provincial Office na si PC/Insp. Arthur Gomez, sinabi kaini na nailatag na kan kada task unit commander an saindang mga gigibuhong lakdang ngane na masierto an seguridad kan mga personalidad na hale sa pa sa manlaen-laeng nasyun sa Asya.
Nakadesignar naman an task unit sa erpuerto, billeting area na may kasabay na convoy asin ambulansya maging sa mga venue o hotel. Igwa man suboot na road asin traffic security sa Misibis area.
Detalyado an gigibuhon kan mga task unit sagkod kan sub-task unit huli sa obhetong maibitaran an anuman na maraot na pangyayari sa mga delegasyon na posibleng maging kasusupgan sa lado kan provincia asin kan enterong rehiyon.
Mientras tanto, sinabi pa ni Gomez na tyansa naman ini kan provincia kan Albay na maipahiling an ipig-oorgulyong turismo asin kun maging magayon an resulta kan pagtenir kan mga bisita, dakula suboot an posibilidad na i-promote an turismo kan Albay.
Sarong dakulang honra man bako sana kan provincia kundi kan nasyun an maitao an maray na seguridad, pasilidad, asin maray na hospitality sa mga bisita kun kaya detalyadong maray an preparasyon kan PNP maski an pinakasadit na bagay.
