LEGAZPI CITY — Pinagbabadil-gadan an sarong electrician asin lugadan man an sarong parasira kan mga pigtutubudang miembro kan rebeldeng New People’s Army (NPA) sa banwaan kan Juban, Sorsogon.
Binisto an nagadan na si Arvin Habana Janoras, 43 anyos mantang nalugadan man si Louie Digo Sentes, 22 anyos na parehong residente kan Brgy. Tughan kan nasabing banwaan.
Base sa imbestigasyon kan Juban Municipal Police, pasiring si Janoras sa harong kan sarong Danny Diamante ngane na ihatod an sarong pambulang na manok sa Brgy. Sablayan kan biglang ranihan kan anom na armadong kalalakihan kaibanan an suboot lider na si alyas Steve asin saka pinagbabadil gamit an duwang M16 asin duwang iba pang klase nin badil.
Nadamay man sana si Sentes na nakatindog dikit na distansya sa pinangyarihan kan insidente kun saen nagsapar ini nin tama sa walang hita.
Makalihis an pambabadil, sinabi suboot kan mga dae pa nabibistong suspek na dae matakot huli sa saro suboot na parahabas an biktima asin lilinigon ninda an gabos na parahabas.
Isinairarom naman sa autopsy examination an electrician mantang nagpaparahay na sa ospital si Sentes.
Dinara naman sa Sorsogon Provincial Crime Laboratory Office an narekober na ebidensya kan mga otoridad sa pinangyarihan kan insidente na sampulong pidaso nin basyo nin bala kan caliber 45 badil asin saro pang bala kan parehong badil para sa eksaminasyon.
