LEGAZPI CITY- Panahon na tangarig na dagos nang butasan an pwestong pigkaklamar pa ni Mayor Billy Ceriola kan banwaan kan Malinao, Albay.
Ini an nagin kasimbagan ni Atty. William Balayo katakod kan ibinabang kasuguan kan Ombudsman na kinapapalamanan kan pagbasura sa isinangat na motion to quash sa writ of execution kan nasabing opisyal.
Enot naman na nagbaba nin kaparehong desisyon an Korte Suprema sa pagpapahale kaini sa posisyon alagad nanindogan an opisyal na hahalaton an ipapaluwas na desisyon kan iba pang concerned body dawa pa pormal nang nagsumpa bilang alkalde si Mayor Sherly Capus Bilo.
Sa intrevista kan Bombo Radyo Legazpi sa nasabing abogado, ipig-eksplikar kaini immediate effectivity an kakabit kan nasabing kasuguan.
Naglalaom man an opisyal na boluntad asin matoninong nang mahale an dating alkalde tangarig na magamit na kan iba pang opisyal an pig-ookupar kaining opisina sa munisipyo.
Magigirumduman na sinangatan nin kaso kan 2013 kan kaitong konsehal na si Ervin Fajut an alkalde katakod kan pagpapa-construir nin cockpit arena sa lugar.
Sa ibong na lado, binweltadahan pa kan nasabing abogado si Ceriola sa rason na tawo an nagtaong mandato sa pagtukaw kaini sa posisyon kun saen segun ki Atty. Balayo, an pagkaelihir digdi an ‘correctible error’ na nakorehir na suboot kan ibaba an desisyon kan Korte Suprema asin Ombudsman.
