LEGAZPI CITY — Dinipensaran ni dating Albay congressman Grex Lagman an kaalyadong si Vice President Leni Robredo kontra sa pag-apod digdi ni Social Welfare Asec. Lorraine Badoy na pasupog sa nasyun.
Ipigladawan ni Lagman si Badoy bilang “full of bullcrap” makalihis na apudon si Liberal Party (LP) Chairman Robredo na “basurera” huli sa pagpili nin second-hand furniture para sa Harvard apartment kan matuang aki na si Aika.
Segun sa aki ni dating House Minority Leader Edcel Lagman, makanos an writing skills kan medical doctor cum socialite cum appointive official kan DSWD, sarala an grammar, logic, asin nakakalat an saiyang pag-iisip.
Nangalas man an abogado kun talagang nag-graduar ini sa University of the Philippines huli sa pagiging arogante asin ignorante.
Dugang kaini, dakula suboot an pagkakaiba kan pagreresiklo asin paggamit liwat nin mga bagay kontra sa pagkakaigwa nin utak-basura.
Kun babalikan, inapod ni Badoy si Robredo na Uncle Sam’s garbage collector o basurera kan mga Amerikano kan nagbakal ini nin second-hand furniture para sa aki na matenir sa Boston, Massachusetts.
Ikinumparar pa kan sekretaryo na mas maray siya sa bise presidente sa pagsasabing pigtatao an saiyang best tuyong nag-aatendir nin mga kumperensya sa ibang nasyun.
