LEGAZPI CITY — Apektado na an dakulang porsyon kan kabubuldan sa Brgy. Morocborocan sa banwaan kan Rapu-rapu, Albay katakod kan nagpapadagos na bush fire.
Sa intrevista kan Bombo Radyo Legazpi ki PS/Insp. Reynaldo Castuera, hepe kan Rapu-rapu Municipal Police, inako kaini na medyo huri an pagpaabot kan impormasyon sa mga otoridad kan mga nakahiling na residente huli sa ipinasipara sana kan mga ini sa paglaom na matutumpos man tulos an kalayo.
Dugang pa kan opisyal na Hunyo 19 pa o kan nakaaging Lunes kan magbungkaras an nasabing kalayo alagad wara man na naapektaran na mga residentes.
Pigtutubudan na igwang nagpakalayo kan mga mamarang kahoy sa lugar na pinadakula pa kan init kan paanahon.
Nagkondusir naman nin inspeksyon sa lugar si Fire Marshall Lita kan Bureau of Fire Protection.
Sa ngonian, uminabot na sa poco mas o menos tolong ektarya an naapektaran kan kasulo alagad nagpapadagos pa man an kalayo kun kaya piglalaoman an pagbulos nin uran tangarig na masigbo ini.
Nagbaba naman nin direktiba an alkalde kan banwaan, Mayor Ronald Galicia nin mahigot na pag-obserbar sa dalagan kan kalayo.
