LEGAZPI CITY — Hinale kan Bureau of Fisheries and Aquatic Resources (BFAR) Bicol an pagkahandal kan mga tilapia growers sa pinangangadamang huma kan tilapia virus (TLV) sa mga aqua farm sa kabikolan.
Sa intrevista kan Bombo Radyo Legazpi ki Nonie Enolva, tagapagtaram kan nasabing ahensya, ipighayag kaining negatibo pa man an mga tilapia sa Bicol sa ikinahahandal na virus.
Sa ibong kaini, nagpaotob naman an BFAR nin mahigot na monitoring urog na sa duwang darakulang danao sa rehiyon, an Lake Bato asin Buhi katakod naman kan ibinabang noticia asin kasuguan kan central office.
Pagtataong-duon pa kan opisyal na dakula an mawawara sa tilapia industry sa Bicol en kaso makontamina an nasabing mga danao huli ta 90% kan pigluluwas o export kan rehiyon an hale digdi.
Enot nang nanotaran an naglalangkaw na kaso kan mga apektado kaini sa mga nacion kan Colombia, Ecuador, Egypt, Israel, asin Thailand kun saen nahiling man an mga senyales kan ulceration o pagkalugad kan sira huli sa nahaleng mga kiskis, malabog na mata o opacity sa lens, maluyang paglangoy, maputlang kulay asin kawaran nin ganang magkaon na nagreresulta sa mass mortality na puon 20 porsyento hasta 90 porsyento.
