LEGAZPI CITY — Pigpipreparar na ngonian kan mga otoridad an kasong kakahampangon kan number 1 most wanted person sa provincia kan Albay makalihis na maarestar sa Museo de Intramuros, Arzobispo St. Intramuros, Manila.
Nabisto an suspek na si Aljun Alemania na residente kan Baldo 1 Relocation Site, Brgy. Anislag, Daraga, Albay.
Segun sa impormasyon, ipinagkondusir an operasyon kan pinagsarong pwersa kan Daraga Municipal Police Station sa pangengenot ni Police Senior Inspector Richelle Balute asin kan MPD-PS5 Ermita Police Station Intel operatives sa pangengenot ni Police Senior Inspector Salvador Iñigo Jr.
Inarestar an suspek sa bisa kan mandamiento de aresto na ipinaluwas ni Judge Edgar Armes kan RTC Branch 4,Legazpi City huli sa kasong panhahabon na igwang rekomendadong piyansa na nagkakantidad nin P40,000 para sa paramientras na libertad.
Sa ngunyan nasa kustodiya si Alemania kan Manila Police District asin nakatalaan na i-turn over sa probinsya.
