LEGAZPI CITY — Labi an pagmumundo ngunyan kan pamilya kan 21 anyos na suldadong nagadan sa panibagong engkwentro sa pagultan kan tropa kan gobyerno asin Maute group sa Marawi City.
Sa intrevista kan Bombo Radyo Legazpi sa ama kan biktima na si Juan Lunas, kapitan kan Barangay Hindi, Bacacay sa Albay, kasubanggi pa sana igwa nang nag-apod sainda asin sinabing may maraot na nangyari sa aki na si Private Bernie John Lunas alagad dae ninda ini tinubudan.
Pigpensar suboot ninda na nalugadan sana an aki.
Alagad pinangluyahan sinda nin buot kan kumpirmahon kan opisyal kan Philippine Marines na kasabay an aki sa 13 miyembro kan Marine Battalion Landing Team na nagadan sa bakbakan.
Si Bernie man an pigkokonsiderar na pinakaaking suldado na nagadan sa nasabing sagupaan.
Segun sa ama, nanghihinayang siya huli sa duwang semana na sana, magradwar na an aki sa schooling kaini kan i-pull out suboot ngane ideploy sa Marawi kan Hunyo 4.
Sa huring pag-oolay sa telepono ni Bernie asin kan ina, naistroya kan aki na puro kape asin tubig-uran sana an saindang pig-iinom sa maghapon.
Sienerto man suboot ni Bernie na maray an kamugtakan kaini asin nasa salbadong lugar kun kaya daeng dapat na ikahadit.
Dugang pa kan ama, makulog man sa saindang buot an nangyari sa aki, inako na ninda ini huli sa parte suboot ini kan sinumpaan ni Bernie bilang sarong suldado.
Nakatalaang magpasiring sa Maynila an magurang ni Bernie ngane mahiling an bangkay kaini na dadaragon sa Fort Bonifacio hale sa Iligan City.
