LEGAZPI CITY- Kooperasyon an hagad ngonian kan Regional Maritime Unit 5 sa publiko katakod kan nakaabot na intelligence report sainda dapit sa pitong behikulo suboot na pigtutubudan na nagta-transport kan mga kontrabando partikular na an mga improvised explosive device (IEDs) na hale pa sa pier kan Dapitan City, Zamboanga del Norte.
Sa intrevista kan Bombo Radyo Legazpi ki PS/Supt. Ronald Magno Barbosa, regional chief kan nasabing ahensya, nakikipagkoordinar naman sinda sa gabos na military unit kan Bicol sa pagbabantay sa seguridad sa mga pier tangarig na dae na makalaog pa sa rehiyon an mga imbweltong behikulo.
Dugang pa kan opisyal na nakaabot naman sa inda an mga naenot pang impormasyon asin naisabay na sa binilog na watchlist.
Nasa close watch man magin an mga personahes kan PNP Highway Patrol Group sa pagkokondusir kan mga checkpoints asin i-hold kun manotaran an mga behikulo sa area of responsibility ninda.
Base kaya sa nagunong impormasyon, pitong luxury cars an nagbibiyahe bako sana kan mga kontrabando kundi magin an mga tawong may mararaot na intensyon asin mawot na magkrear nin kariribukan sa iba pang parte kan nasyon alagad nakuha naman an plate number kan mga ini.
Nakikipagtabangan naman an mga ini sa lokal na opisyal kan mga munisipalidad tangarig na kahampangon an problema na bako sana suboot para sa sarong komunidad o rehiyon kundi posibleng magin problema pa kan bilog na nacion.
