LEGAZPI CITY — Sinabat nin dakol na aktibidad an nagin pagselebrar kan World Environment Day kasuodma asin pormal na pagpupuon kan Environment Month sa pangengenotan kan Department of Environment and Natural Resources (DENR).
Napag-araman ki Aldrin Baroca, executive assistant kan DENR na nagkaigwa kan local clean up sa gabos na PENRO asin CENRO siring man an mangrove tree planting sa Brgy. Puro kan ciudad kan Legazpi na sinabayan pa kan disaster preparedness and climate change information and communication awareness campaign kun saen mayor na obheto an matukduan an mga residente sa epekto kan climate change sa mga coastal community.
Apwera sa nasabing mga aktibidad, igwa man na ikinondusir na mga workshops sa basic firefighting, tsunami warning awareness, asin simulation kan earthquake drill.
Sa ibong na lado, nagpipreparar man an ahensya sa maabot na 5th Regional Biodiversity Challenge na katuyuhan an ipaisi sa komunidad an mga environmental activities na nangangaipo nin physical and mental ability mientras na promosyon naman kan eco tourism.
Maglalaban-laban sa ‘localized Amazing Race’ an 35 teams na hale pa sa mga manlaen-laen na national and local agencies, non-government organizations asin mga uniformed personnel.
Binuksan ini para sa edad 18-50 anyos mientras na madurar nin tolo hasta limang oras.
Kakabit kan manggana sa kompetisyon an premyong P20, 000 sa first prize, P15, 000 sa ikaduwa asin P10, 000 para sa pantolong finisher.
