LEGAZPI CITY- Kinondenar kan sarong youth ambassador an naging pagsakyada kan teroristang Maute group sa ciudad kan Marawi na rason tangarig na magbungkaras an kariribukan asin magdeklarar nin Martial Law.
Sa intrevista kan Bombo Radyo Legazpi ki Rohanisa Deca Fahmi, tinawang-duon kaini an pagkauyam sa mga ipigsasagibong kariribukan kan teroristang grupo na ISIS na ipigkokonektar sa pagtataong-honra ki Allah, na siyang pigbibistong Diyos kan relihiyong Islam.
Segun ki Fahmi, ‘very un-Islamic’ an mga gibo kaini asin harayuon sa mga katukduan kan Islam siring na sana kan panggagadan asin panraraot nin mga pagrurugaring.
Nangapodan pa ining punduhon na an pagkonektar kan mga Muslim sa gibo kan mga ISIS.
Sa ibong na lado, ikinakahandal man kaini an pagdugang kan pwersa kan Maute group kun saen base suboot sa nagunong impormasyon ni Fahmi, naghaharong-harong an grupo tangarig maghanap nin mga lalaki na sapiritan na papaintrahon sa grupo na kun dae magtugot an gagadanon.
Sa presente, nasa Cotabato na si Fahmi asin wara nang planong magbalik pa sa ciudad kan Marawi an pamilya kun saen apat na taon man ining nag-istar duman alagad bukas pa man giraray sa posibilidad en kaso mapuho na an terorismo sa lugar.
