LEGAZPI CITY- Dae pwedesir na malingawan kan sarong residente asin youth ambassador sa ciudad kan Marawi an labing takot na naeksperyensyahan sa nagpapadagos na kariribukan entre kan gobyerno asin teroristang grupo kan Maute.
Ipigsaysay ni Rohanisa Deca Fahmi, sa ekslusibong intrevista kan Bombo Radyo Legazpi an mga pangyayari antes pa man na magbungkaras an engkwentro kun saen nakaresibe na suboot sinda nin mga patanid sa paagi kan social media asin texts na mag-evacuar na huli ta pirang oras na sana makakaabot na sa lugar an ISIS-affiliated group.
Sa pinakaenot na bes suboot sa tanang buhay kaini na maipit sa war zone asin wara pa an presensya kan pamilya.
Kan magdesider man na maguli na sa harong, dakol na mga sibilyan an nagsabat sa mga pasahero asin sinabing dae na magdagos pa huli ta pwedesir na matuparan sa dalan an mga nagdadangadang na Maute kun kaya napiritan si Fahmi kaibanan an iba pang pasahero na makikaturog sa mga harong sa lugar.
Bilog na banggi suboot nindang nadangog an mga ribayan nin putok mientras na ikinahandal an seguridad huli naman sa posibilidad na tamaan nin ligaw na bala.
Magin sa pagluwas sa lugar, nagdugang pa sa takot kan mahiling na nagsasagibo nin checkpoint sa mga maluwas sa lugar an mga miembro kan Maute.
