LEGAZPI CITY — Klinaro kan hepe kan Malinao Municipal Police na pribadong lote an idinonar ni outgoing Mayor Billy Ceriola para sa pagtutugdukan kan saindang bagong hepatura.
Segun ki PC/Insp. Virgil Bibat, an local govenrment unit kuta kan Malinao an matao nin lote alagad kulang an saindang rekisitos.
Nakapagkondusir naman suboot sinda nin absolute bid of donation na patotoong pagsadiri na kan Malinao PNP an 400-square meter na lote sa Barangay Balanid.
Pighahalat man suboot ninda na maaprubaran an pondo para sa konstruksyon kan edeficio na nagkakantidad nin P4,713,000.
Sinabi pa kan hepe na naghahanap naman sinda nin lote o lugar na mapagtatambakan nin mga na-impound na kahoy asin motorsiklo.
Pighahalat ngunyan kan Malinao Police na matapos na an suspension order hale sa Department of Budget and Management ngane na maipadagos na an pre-bidding.
Enkaso mapunan an proseso o an konstruksyon sa Hunyo, aabuton suboot nin anom na bulan an pagkonstruhir kaini na posibleng matapos ngunyan na taon.
Mientras tanto, nilinaw man ni Bibat na warang koneksyon an suspensyon sa pigkakahampang na kaso kan alkaldeng si Ceriola.
