LEGAZPI CITY — Positibo an bagong pamayo kan Bureau of Internal Revenue (BIR) Bicol na maaabot kan rehiyon an target kaining tax collections na P10.9 bilyon.
Segun ki BIR Bicol Director Edgar Tolentino, parte an localized information campaign ngane na iengganyar an mga taxpayers na magbayad kan tamang buwis.
Naipahiling man suboot sa records kan ahensya na an koleksyon kan nakalihis na taon an igwa nin 16.25 percent increase kumpara kan 2015.
Dugang pa ni Tolentino, naglalaom sinda nin growth rate na 20 porsyento hale sa 333,000 strong registered taxpayers sa rehiyon.
Mientrastanto, naging huespe de honor sa aktibidad si BIR Commissioner Caesar Dulay kun saen sinabi kaini na pigkukua kan gobyerno an 80 porsyento kan revenue kaini hale sa BIR alagad pigkontribwir ini kan mga nagbabayad nin buwis.
Sinabi pa kan BIR Commissioner na an buwis an ‘lifeblood’ kan nasyun.
Dae man suboot makakahiro an gobyerno kun wara an mga buwis na pigkontribwir kan mga namamanwa.
Inatendiran an paglunsar kan tax campaign nin rinibong local government officials, partner government line agencies kan BIR, mga negosyante asin grupo nin taxpayers’ organizations sa rehiyon.
