LEGAZPI CITY- Nasa syudad na kan Legazpi an 14 team na malaban-laban sa Le Tour de Filipinas 8th Edition na sarong international cycling contest.
Sigon ki Legazpi City Mayor Noel Rosal, walong nasyun an kabale digdi arog kan Kazakhstan, Japan, Korea, Taipei, China asin duwang team gikan sa Pilipinas.
Mapuon an enot na 90 kilometer-leg alas 8:00 nin aga sa Legazpi Boulevard asin malibot sa Mount Bulusan antes na magpasiring sa sentro kan Sorsogon.
Katakod kaini, nangapodan an alkalde nin suporta sa mga Bicolano para na man sa ikatatrayumpo kan dakulang event.
Ini na kaya an panduwang beses na isasagibo sa syudad an cycling contest.
Sa ibong na lado, sienerto ni Mayor Noel Rosal na matabang an lokal na gobyerno kan Legazpi sa Philippine National Railways (PNR) sa pag-clear sa mga informal settlers na nasa 5-10 danger zone na ipigtalaan kan ahensya.
Ineksplikar kan opisyal na biglaan an nagin liwat na operasyon kan tren kun kaya dae sinda nakapagpreparar.
Katakod ini kan agrangay kan PNR sa enot nindang byahe kasuudma na Naga-Legazpi kun sain nanotaran an mga harong na aranihon nang maray sa riles.
