LEGAZPI CITY- Labi an pagpapasalamat kan Bicolanang si Quennie Marie Bañares makalihis na makua an ikasiyam na pinakahalangkaw na pwesto sa October 2019 Chemical Technician Licensure Examination sa rating na 89.00%.
Sa eksklusibong intrevista kan Bombo Radyo Legazpi ki Bañares na tubong Bacacay, Albay, target sana suboot na makapasar sa eksaminasyon mantang sarong semana sana na nag-review kaya labi an pagkabigla kan makaibanan sa Top 10.
Inapod ni Bañares na dakulang blessing an pagkakapasar sa eksaminasyon na makakatabang suboot sa pagkua kan magayon na trabaho asin maray na futuro.
Katakod kaini, pinasalamatan ni Bañares an mga magurang na nagsirbing-inspirasyon urog na kun nadidificilan na sa pag-aadal; mga kaklase; amigo asin an Kagurangnan.
Mientras tanto, dae pa man nakakapagselebrar si Bañares sa achievement huli ta busy pa sa Manila sa pagre-review para sa Chemical Engineering Board Exam ngonian na Nobyembre.
