LEGAZPI CITY — Banga an atensyon ngunyan kan Armed Forced of the Philippines (AFP) katakod kan pag-obserbar kan panahon kan Kuwaresma partikularmente an Semana Santa.
Sa ngunyan, sinabi ni Capt. Randy Leonar, an bagong tagapagtaram kan 9th Infantry Spear Division kan Philippine Army na nakalatag na an saindang mga planong pag-seguridad ngani na masiertong matoninong an pag-girumdom kan nasambitan na relihiyosong okasyon.
Alagad dae man pwedesir na itutok sana kan saindang pwersa an bilog na atensyon sa selebrasyon na ini huli ta sigon ki Capt. Leonar, puon kan saiyang pag-asumir sa pwesto, igwa na sindang mga na-monitor na engkwentro sa pagultanan kan militar asin rebeldeng New People’s Army (NPA.)
Kun magigirumduman, komon na nagkakaigwa nin bakbakan an duwang lado makalihis an mga ipigsasagibong combat operation kan mga soldados ngani na masimbag an sumbong kan nagkapirang residentes dapit sa extortion asin iba pang aktibidad kan NPA.
Sa ibong na lado, makalihis na magka-sundo an mga negotiators kan gobyerno asin kan komunistang National Democratic Front (NDF) na magkaigwa nin joint interim ceasefire ngani na ibaba na muna an armas mientras na pigpaplantsa an pinal na peace deal, sinabi ni Leonar na kun in kaso magbalgar digdi an NPA na armed wing kan NDF, dae sinda maduwa-duwang isip na labanan an mga ini ngani na maprotihiran an seguridad asin katoninongan sa gabos na lugar sa rehiyong Bicol.
