LEGAZPI CITY— Nagpapadagos ngunyan an ikinokundusir na imbestigasyon kan mga otoridad ngani na mahiling kun gurano kagabat an kinakaipuhan na panimbagan kan mga rebeldeng New People’s Army (NPA) katakod kan pagkagadan kan sarong lola asin duwang apo kaini na naipit sa bakbakan kan mga rebelde asin militar sa Sitio Lubigan, Brgy. Panan Awan, Cawayan, Masbate.
Sa intrevista kan Bombo Radyo Legazpi ki 9th Infantry Division Public Affairs Office Chief Capt. Randy Llunar, sinabi kaini na nagpaabot na man nin asistensya sa pamilya kan mga nadamay na sibilyan.
Kinumpirmar man kan opisyal na saro sa mga istilo ngunyan kan mga NPA an pagamit sa mga sibilyan bilang human shield ngani na makatago asin makadulag sa mga soldados.
Magigirumduman na nakahampang kan pwersa kan 3rd Scout Ranger Company kan Philippine Army an mga pinagtutubudan na miyembro kan NPA kun sain nagadan an tulong sibilyan.
Segun ki Llunar, tulos sindang pinaputukan kan mga rebelde kun kaya wara sindang magigibo kundi magbalos.
Nagtutubod man an opisyal na igwang nalugadan sa mga rebelde huli sa mga dugo na nahiling kan mga militar sa lugar na pinagtaguan kan mga ini alagad dae pa makumpirmar kun igwa nin nagadan sa lado kan NPA.
