LEGAZPI CITY—Wara na nin buhay kan madukayan an sarong 84-anyos na lolo na nawawara sa Brgy. San Nicolas sa banwaan kan Panganiban, Catanduanes.
Segun ki MDRRMO Panganiban PIO Christian De Jesus, sa intrevista kan Bombo Radyo Legazpi, an biktima nawara kan Enero 28 asin nadukayang wara na nin buhay kan nakalihis na aldaw sa sarong omahan sa Barangay San Pedro kan nasambitang banwaan.
Susog sa mga pag-iriba sa harong kan biktima, na ini nagluwas sa harong alagad makalihis an pirang oras dae na ini nakabalik pa.
Kun kaya ini-report ini sa kapulisan sa pakikipagkoordinar sa Municipal Disaster Risk Reduction and Management Office para sa sarong follow-up operation.
Tulos man na hinanap kan saindang mga personahes an mga posibleng lugar na pigdudumanan kan biktima, alagad dae na ini nahanap pa.
Pigtaram kan opisyal na nakikipagkoordinar man sinda Provincial Disaster Risk Reduction and Management Office (PDRRMO) para sa kadugangang tabang sa paghanap.
Dugang ni De Jesus, na huli na man sa pagigin ulyanin kan biktima, pwedesir ini na nawara asin dae nakabalik sa harong ninda.
Alagad kan Pebrero 1, sarong paraoma na pasiring sa saiyang karabaw, an nakahiling sa hawak kan biktima sa sarong omahan.
Posible suboot na nalamos an biktima sa may parte kan tubig kan omahan asin dae na nakaahon pa huli kan dugi.
Mientrastanto, nangapudan man an opisyal lalo na sa mga gurang na magpaaram sinda kun saen maduman ngani aram ini kan saindang pag-iriba siring man na i-report sa mga otoridad an mga siring na insidente para matawan nin tulos na aksyon.
