LEGAZPI CITY — Binawian nin buhay an sarong senior citizen makalihis na mabangga kan sarong kotse sa Barangay Tuburan, ciudad kan Ligao sa Albay.
Binisto an biktima na si Antonio Pantares Moises, 82-anyos asin residente kan nasambit na barangay.
Base sa inisyal na imbestigasyon, naglalakaw sa tuong parte kan gilid kan tinampo an biktima kan aksidenteng mabangga kan kotse na pigmamanehar ni Cesar Mark Gonzales Lausingco, 26-anyos na residente kan Polangui asin casual employee sa Polangui Municipal Hall.
An nasabing driver an pasiring kuta sa ciudad kan Legazpi kan mangyari an aksidente. Tulos man na naidalagan sa ospital an biktima alagad idineklarang dead-on-arrival.
Sa ngonian, nasa kustodiya kan Ligao City Police an driver para sa magkakanigong disposisyon.
