LEGAZPI CITY- Nagmumundo ngonian an sarong pamilya sa Brgy. 1 Pioduran sa Albay makalihis na madiskubre na wara nang buhay ang sarong walong bulan na umboy sa sirong kan saindang harong.
Sa ekslusibong intrevista kan Bombo Radyo Legazpi ki PC/Insp. Joseph Jarabejo, hepe kan Pioduran Municipal Police, harani sa salog an harong na gibo sa butong kaya medyo elevated ini sa pigkakarkulong limang metrong langkaw.
Nagluluwas sa inisyal na imbestigasyon kan pulisya na nasa kasiraman nin turog an mag-agom mantang kataid man kan babayi an umboy kan dae manotisyaran na nagimata na palan an aki asin pigtutubudang naggapang na sa salog.
Aga na kan mahiling kan mag-agom na wara na an umboy na babayi kaya naghanap sa palibot kan harong alagad hudyan na kan mahiling na nagpapataw-pataw na ini sa tubig sa ibaba asin dae naman naghahangos.
Napag-araman na may luho an salog kan harong kun sain pigtutubudan na naglusot an umboy asin nagdagos-dagos sa natipon na tubig makalihis an namatean na makusog na bulos kan uran sa nakalihis na magdamlag.
Katakod kaini, liwat na nagpagirumdom an mga otoridad na magsunod sa mga abiso tangarig na maibitaran an mga untoward incidents makalihis na mapag-araman na naglibot na man an disaster management officials tangarig na mag-abiso nin pag-evacuar sa mga nasa flood-prone areas.
